 |
||
|
|
DIEZ MARCHAS TA MUITAS VOCES O diez de abril de o 2010 se celebra a decena edición d’a cursa contra la Macrogarchola de Zuera (Zaragoza). Ista fita, que en veras nos produce un poquet de vertigo a las personas que escomencipiemos iste prochecto no fa que cinco meses dimpues de l’enguero d’o Centro (chunio d’o 2001), nos obliga a reflexionar sobre istos diez anyos de luita anticarcelaria, compartir con totz y todas os nuestros remeros, reivindicacions, y ¿por qué no?, preocupacions sobre l’esvenidero d’ista iniciativa.
A Iniciativa Ciudadana contra la Macrogarchola naixió poco antes de l’enguero d’o Centro Penitenciario con vocación integradora d’os movimientos socials d’a ciudat de Zaragoza y refirmada por a veterana ASAPA (Asociación de Seguimiento y Refirme de Presos y Presas de Aragón), de feito estió a presentación de un informe de iste colectivo lo que nos achuntó. L’antiga garchola de Torrero, en o casco urbano de Zaragoza, estió ta muitos colectivos d’a ciudat (antimilitaristas, ecolochistas, anarquistas y autonomos) un simbolo d’a luita antirrepresiva. Se feban muitas concentracions en as suyas puertas y muitas manifestacions remataban astí. L’enguero d’o centro de Zuera (a 50 km. d’a ciudat y en o preto de cosa) suposaba a invisibilizacion d’a garchola de cara t’a sociedat. Os movimientos socials decidiemos que, a lo menos una vez par d’anyo, hébanos de remerar a la chent que o “talego” continaba astí, que os/as presas debeban sentir a solidaridat d’o pueblo aman, y a chent debeba meter-le “rostro”a la garchola de Zaragoza. No ixublidamos en aquellas primeras reivindicacions que as consecuencias mas practicas y negativas de iste cambio de puesto las sufren os/as familiars y parentalla que han de fer kilometros ta reyalizar as visitas, con l’agravant de que no bi ha que un par de coches-linia nomás que os cabos de semana. Si yes parient de preso/a que antimás sufre a dispersión y no en tiens d’auto, a situación ye a saber de embolicada.
Torrero yera un centro muito viello con capacidat ta bellas 300 personas, y de feito yera a caramuello porque mientres mas de hueito anyos (mientres o tiempo que se rezagó l’enguero d’a macrogarchola) no se i fació garra inversión, o modulo de cumplimiento ta mullers, por eixemplo, yera una cambra de chicotas midas an que encara bi heba celdas colectivas. Zuera se presentó de cara t’a sociedad como un centro moderno y equipau con capacidad ta 1008 personas, pero en reyalidat, leixos de superar l’hacinamiento, iste se dispara, un anyo dimpues de l’enguero ya se completó y imos sumando dica os, si fa u no fa 1800 presos/as que acubilla en l’actulidat. O sistema de macrogarchola conleva a mancanza de asistencia sanitaria y psicolochica, tallers, actividatz, programas de rehabilitación y reinserción, asinas asinas. Queriemos tamién exponer que as macrogarcholas conlevan un modelo despersonalizau de cumplimiento de condena an que pasas a estar un numero, an que os conceptos de tratamiento individual se quedan que en palabras. Creyar rufierta social sobre o sistema Penitenciario espanyol y a cultura punitiva estió atra de as nuestras prioridatz. Asinas, con os nuestros comunicaus, charradas y atras actividatz previas queriemos informar y discutir anyo par d’atro sobre temas relacionaus con as garcholas; dende chicotz y reforma dica la transexualidad en prision, pasando por penas de larga duración, salut, consecuencias familiars, tortura, muerte en prision, dispersión, o negocio d’a garchola, migración…asinas asinas. Desgraciadament continan d’actualidat as razons que nos levón enta celebrar ista primera cursa l’11 de Noviembre de 2001, actualment l’Estau Espanyol ye o territorio d’Europa que más engarchola. A tamás de no estar un d’os estaus con más tasa de delinqüencia, ye l’estau con mayor numero de personas engarcholadas, más de 76.000 frent a os 50.000 de fa una decada. S’han endureixiu as penas de garchola (reforma penal de 1995, Doctrina Parot…) y no s’ha feito garra poder ta posibilitar l’aplicación d’atras penas diferents a la garchola recullitas en o codigo penal.
As politicas policials y penals actuals plenan de castiegos a la chicota delinqüencia, enristen delitos de poca repercusión social y amagan atros de mayor trascendencia, afundan en a exclusión d’as personas engarcholadas, vulnerando a propia lechislación. As politicas socials de control clientelizan a la población amarguinada, criminalizan a os immigrants pobres, lo que sirve de pretexto a la inchusticia penal punitiva y a tot lo gasto que conleva ista industria de control social. Dende ista Iniciativa, continamos proposando rematar con o sistema punitivo que fa cutianas as inchusticias socials y fer una apuesta por politicas educativas y de reinserción eficaces, subrayando a importancia de buscar una solución social a os conflictos. Fendo una uellada enta zaga, creyemos que hemos prevocau una rufierta necesaria entre os movimientos socials y os meyos sobre a custión garcholaire, una rufierta que estando realistas no ye prioritaria ta muitos colectivos y achents socials d’a ciudad. A Cursa tamién nos ha permitiu de compartir con atras organizacions de l’estau as nuestras inquietutz y luitas, convidando-las a participar en as actividatz previas y en a mesma cursa, asinas son pasadas por Zaragoza chents de Madrid, Barcelona, Galiza, Euskal Herria…etc, compartindo con nusatras istas anyadas de treballo. Ye de dar que encara nos manca muito camín por recorrer, encara somos luen de prevocar que os movimientos socials d’a ciudat adiban ista luita en o suyo treballo global y en as suyas reivindicacions, que faigan suya ista luita que ye de totz y de todas, y encara somos luen de que a Cursa contra la Macrogarchola de Zuera siga multitudinaria, y que plegue en os/as familiars y os/as presos/as como vehíclo ta integrar as suyas protestas y proposas… en ixo i somos.
Antis de no rematar queremos remerar os “diyas D”, agradeixendo en primerías a todas as personas que se’n son amanadas a beluna d’as suyas edicions y a las que s’escriben con presos/as a radiz d’os tallers de cartas, a os/as que han feito posible Radio Hawai y que se nos ascuite ixe diya dende as cambras, a las chents d’o teatro, a txalaparta y as batukadas, a os/as encargaus d’as procheccions, as distris, as chentas y os vermutz, a os tecnicos de soniu y todas as collas de hardcore, punk, rock, rap y flamenco que i han tanyiu y a totz os colectivos y collas de refirme a presos/as que han feito charradas informativas ixe diya. Gracias tamién a os disenyadors d’os cartels y d’a web por a calidat d’o suyo treballo a zofra y a la fin, a totz y todas os que s’han embrecau en iste prochecto. No queremos diez anyadas más de cursa si isto implica diez anyadas más de macrogarchola, pero si que queremos diez anyadas más d’ilusión d’a chent nueva y de representants de diferents colectivos que arroclen a tot l’espectro social, ta que ixa rufierta plegue en totz os costaus posibles. Tos i asperamos a totz y a todas (d’aquí, d’astí y de dillá) ta participar en a organización y ta asistir a la X Cursa contra la macrogarchola de Zuera y as suyas actividadz previas y fer-le asinas a empenta que se mereix.Abaixo os muros d’as garcholas. Iniciativa Ciudadana contra as Macrogarcholas |
|
